hum raaz-e-giraftari-e-dil jaan gae hain
phir bhi teri aankhon ka kaha man gae hain
tu shola-e-jaan nikhat-e-gham saut-e-talab hai
hum jaan-e-tamanna tujhe pahchan gae hain
kya kya na tere shauq mein TuTe hain yahan kufr
kya kya na teri rah mein iman gae hain
is raqs mein shole ke koi sehr to hoga
parwane baDi aan se qurban gae hain
khinche hai mujhe dast-e-junun dasht-e-talab mein
daman jo bachae hain gareban gae hain
'baqar' hai isi gard-e-rah-e-dil ka parastar
jis rah se kuchh sahab-e-diwan gae hain
Ghazal
Hum raaz-e-giraftari-e-dil jaan gae hain
Sajjad Baqar Rizvi