Hum qatl ho gae nahin tujhko KHabar hanuz

hum qatl ho gae nahin tujh ko KHabar hanuz
bandhe phire hai hum pe miyan tu kamar hanuz

sau sau tarah ke wasl ne marham rakhe wale
zaKHm-e-firaq hain mere waise hi tar hanuz

kholi thi KHwab-e-naz se kis ne ye uTh ke zulf
lati hai bu-e-naz nasim-e-sahar hanuz

wadon pe tere kaam bhi mera hua tamam
baaten hi tu banaya kiya yar par hanuz

jo dudh ka jala ho piye chhachh phunk phunk
hun wasl mein pe hijr se hai mujh ko Dar hanuz

bhule se tu ne pyar ki ek din kahi jo baat
rota hun dil hi dil mein use yaad kar hanuz

ujDe hazar shahr 'hasan' aur phir base
aabaad par hua na ye dil ka nagar hanuz