hum paDh rahe the KHwab ke purzon ko joD ke
aandhi ne ye tilism bhi rakh Dala toD ke
aaghaz kyun kiya tha safar in KHalaon ka
pachhta rahe ho sabz zaminon ko chhoD ke
ek bund zahr ke liye phaila rahe ho hath
dekho kabhi KHud apne badan ko nichoD ke
kuchh bhi nahin jo KHwab ki surat dikhai de
koi nahin jo hum ko jagae jhinjhoD ke
in paniyon se koi salamat nahin gaya
hai waqt ab bhi kashtiyan le jao moD ke
Ghazal
Hum paDh rahe the KHwab ke purzon ko joD ke
Shahryar