hum ko to intizar-e-sahar bhi qubul hai
lekin shab-e-firaq tera kya usul hai
ai mah-e-nim-shab teri raftar ke nisar
ye chandni nahin tere qadmon ki dhul hai
kanTa hai wo ki jis ne chaman ko lahu diya
KHun-e-bahaar jis ne piya hai wo phul hai
dekha tha ahl-e-dil ne koi sarw-e-nau-bahaar
daman ulajh gaya to pukare babul hai
baqi hai pau phaTe bhi sitaron ki raushni
shayad mariz-e-shab ki tabiat malul hai
jab mo'atabar nahin tha mera ishq-e-bad-guman
ab husn-e-KHud-farosh ka rona fuzul hai
luT kar samajh rahe hain ki nadim hai rahzan
kitni hasin ahl-e-murawwat ki bhul hai
Ghazal
Hum ko to intizar-e-sahar bhi qubul hai
Qateel Shifai