Hum KHudai ka dawa to karte nahin

hum KHudai ka dawa to karte nahin
bandagi par bhi pure utarte nahin

yun to qaem hain iman pe apne magar
dil ke wahm-o-guman se mukarte nahin

juzw-e-haq hain nahin hum kisi ke mutia
KHud pe nazan hain baatil se Darte nahin

apni KHud-e'timadi ka aalam hai ye
TuT jaane pe bhi hum bikharte nahin

dil mein jab tak na ho ek kasak dard ki
aadamiyyat ke jauhar nikharte nahin

hai na duniya hi apni na apna KHuda
be-kasi ke ye din ab guzarte nahin