hum buzurgon ki aan chhoD aae
KHandani makan chhoD aae
us qabile mein sare gunge the
hum jahan par zaban chhoD aae
us ka darwaza band paya to
dastakon ke nishan chhoD aae
roTi kapDe makan ki KHatir
roTi kapDa makan chhoD aae
ek us ko talash karne mein
hum zamin aasman chhoD aae
ab safar hai yaqin ki jaanib
waswase aur guman chhoD aae
Ghazal
Hum buzurgon ki aan chhoD aae
Nadeem Mahir