Hum ahl-e-arzu pe ajab waqt aa paDa

hum ahl-e-arzu pe ajab waqt aa paDa
har har qadam pe khel naya khelna paDa

apna hi shahr hum ko baDa ajnabi laga
apne hi ghar ka hum ko pata puchhna paDa

insan ki bulandi o pasti ko dekh kar
insan kahan khaDa hai hamein sochna paDa

mana ki hai farar magar dil ko kya karen
mazi ki yaad hi mein hamein Dubna paDa

majburiyan hayat ki jab had se baDh gain
har aarzu ko panw-tale rondna paDa

aage nikal gae the zara apne-ap se
hum ko 'habib' KHud ki taraf lauTna paDa