Hai kis ke liye lutf ghazab kis ke liye hai

hai kis ke liye lutf ghazab kis ke liye hai
ye zabta-e-nam-o-nasab kis ke liye hai

mere liye afsurdagi-e-naKHl-e-tamanna
ye silsila-e-tak-e-tarab kis ke liye hai

sach par jo yaqin hai to use kyun nahin kahte
aaKHir ye zaban mohr-ba-lab kis ke liye hai

hai jis pe mohabbat ki nazar hoga pareshan
ai sana-e-gul hijr ki shab kis ke liye hai

jab dil ko talluq na raha ku-e-sanam se
ye kashmakash-e-tark-o-talab kis ke liye hai

is kar-e-nazar ne kiya taqdir ka qail
shab kis ke liye hasil-e-shab kis ke liye hai