Hai jo bigDi hui surat meri bimari ki

hai jo bigDi hui surat meri bimari ki
pyar mein mujh se kisi shaKHs ne ghaddari ki

har taraf KHun-KHaraba kiya logon ne bapa
sher taKHliq kiye main ne ghazal jari ki

har-nafas sine mein patthar ki tarah lagta hai
zindagi mujh pe sitam-kesh ne yun bhaari ki

ye alag baat ki har lahza pareshan main hun
main ne sachchai ki is par bhi taraf-dari ki

main ne har bar haqiqat ki nazar se dekha
us ne har bar mere sath adakari ki

phul ki misl mahak uTThega qarya qarya
apne is des ki jab hum ne kaman-dari ki

qafile walon ko manzil na mili barson se
ye bhi KHubi hai teri qafila-salari ki

zindagi apne bharose pe guzari main ne
waris-e-taKHt ne kab meri nigah-dari ki

is se badlega mere shahr ka sara manzar
lahar jo uTThi mere shahr mein bedari ki

rashk aata hai hamein apne muqaddar pe 'nabil'
aal-e-ahmad ki sada hum ne aza-dari ki