Hai jo bhi jaza saza ata ho

hai jo bhi jaza saza ata ho
hona hai jo aaj barmala ho

us din bhi jo sar pe dhup chamki
jis din pe bahut farefta ho

us raat bhi nind agar na aai
jis raat pe is qadar fida ho

rangon mein wahi to rang nikla
jo teri nazar mein jach gaya ho

phulon mein wahi to phul Thahra
jo tere salam ko khila ho

ek shaKHs KHuda bana hua hai
kya ho jo yahi mera KHuda ho

saugand mujhe ghazal ki 'gauhar'
main ne jo zaban se kuchh kaha ho