Hai aam azal hi se faizan mohabbat ka

hai aam azal hi se faizan mohabbat ka
imkan musallam hai imkan mohabbat ka

toDa nahin ja sakta paiman mohabbat ka
nuqsan KHud apna hai nuqsan mohabbat ka

phir un ki nigahon se Takrai meri nazren
phir baDhne laga dil mein tufan mohabbat ka

ek ek tamanna mein lakhon hain tamannaen
armanon ki duniya hai arman mohabbat ka

is waste muslim ki fitrat mein mohabbat hai
deta hai sabaq us ko quran mohabbat ka

barbaad-e-mohabbat ki haalat hai ajab haalat
hai be-sar-o-samani saman mohabbat ka

jazbaat mohabbat ke main lakh chhupata hun
karti hain meri nazren elan mohabbat ka

goya mere sine mein mizan-e-mohabbat hai
yun dil mein jigar mein hai paikan mohabbat ka

wo nur ka partaw hai ya husn ka partaw hai
hai din mohabbat ka iman mohabbat ka

jo dard ka hamil hai wo zauq mein kaamil hai
behis ko nahin hota iqan mohabbat ka

ijmal ye be-shak hai tafsil ka aaina
mazmun pe hawi hai unwan mohabbat ka

hain us ke tasawwur ko ghere hue arman sab
rahta hai faqiron mein sultan mohabbat ka

aati hai nazar us mein iKHlas ki har surat
aaina hai aaina insan mohabbat ka

nairang mohabbat ka har sher se zahir hai
hai 'qadr' ka diwan bhi diwan mohabbat ka