hae us be-KHud-e-shabab ka rang
lal angara sa sharab ka rang
ho gaya KHun hasrat-e-didar
de diya ashk ne shahab ka rang
us ki KHush-bu gulab ki KHush-bu
rang us shoKH ka gulab ka rang
satyanas ho gaya dil ka
kya kahun us jale kabab ka rang
bijliyan dushmanon pe girti hain
dekh kar mere iztirab ka rang
wo sar-e-sham sair ko nikle
paD gaya zard aaftab ka rang
us ke ruKH par nikhar gai surKHi
allah allah us hijab ka rang
mand hai raat-din tere aage
mahtab aur aaftab ka rang
itni shoKHi safi' kisi mein kahan
rang mein rang to sharab ka rang
Ghazal
Hae us be-KHud-e-shabab ka rang
Safi Aurangabadi