hadisa ishq mein darpesh hua chahta hai
dil shahanshah se darwesh hua chahta hai
ishq ko zid hai ki tamir kare shahr-e-umid
husn kam-baKHt bad-andesh hua chahta hai
is ilaqe se mera koi talluq bhi nahin
ye ilaqa ki mera desh hua chahta hai
mere ashaar mein ghazlon main mere giton mein
ek ka zikr kam-o-besh hua chahta hai
jah ki chah nahin KHwahish-e-mansab bhi nahin
mere andar koi darwesh hua chahta hai
malik-e-saut-o-sada shaer-e-gumnam raza
teri dahliz pe ab pesh hua chahta hai
Ghazal
Hadisa ishq mein darpesh hua chahta hai
Hashim Raza Jalalpuri