guzar ko hai bahut auqat thoDi
ki hai ye tul qissa raat thoDi
jo mai zahid ne mangi mast bole
bahut ya qibla-e-hajat thoDi
kahan ghuncha kahan us ka dahan tang
baDhai shaeron ne baat thoDi
uThe kya zanu-e-gham se sar apna
bahut guzri rahi haihat thoDi
KHayal-e-zabt-e-girya hai jo hum ko
bahut imsal hai barsat thoDi
pilae le ke naqd-e-hosh saqi
tahi-daston ki hai auqat thoDi
wahi hai aasman par ganj-e-anjum
mili thi jo teri KHairaat thoDi
tera ai duKHt-e-raz wasif hai waiz
pae-hurmat hai itni baat thoDi
chalo manzil 'amir' aankhen to kholo
nihayat rah gai hai raat thoDi
Ghazal
Guzar ko hai bahut auqat thoDi
Ameer Minai