Gulshan mein ye kamal tujhe dekh kar hua

gulshan mein ye kamal tujhe dekh kar hua
phulon ka rang lal tujhe dekh kar hua

muddat ke baad aaj mile hain to jaan-e-man
dil ko bahut malal tujhe dekh kar hua

aao hum aaj chand ka qarza utar den
taron ko ye KHayal tujhe dekh kar hua

KHushbu se kis zaban mein baaten karenge log
mahfil mein ye sawal tujhe dekh kar hua

ashkon se jab likhenge ghazal tab sunaenge
is dil ka jo bhi haal tujhe dekh kar hua