Gul ki aur bulbul ki sohbat ko chaman ka shana hai

gul ki aur bulbul ki sohbat ko chaman ka shana hai
sarw hai jun shama tis par faKHta parwana hai

roz o shab ya nauha ya zari hai ya aah-o-fughan
ya ilahi ye koi dil hai ki matam-KHana hai

tan kar us ki tegh ke aage hua hai sar-ba-kaf
hai qayamat hai ghazab ye dil hai ya diwana hai

bulbul-e-taswir ki manind said-e-dil ke tain
ne hawa uDne ki ne parwa-e-ab-o-dana hai

ek haalat par na dekha us ko hum ne ek aan
gah gul o gah bulbul o gah shama o gah parwana hai

moatakif ho shaiKH apne dil mein masjid se nikal
sahib-e-dil ki baghal mein dil ibaadat-KHana hai

mai-kasho mujh ko tumhaari bazm ki hasrat nahin
pas mere dida o dil shisha o paimana hai

KHwab mein the jab talak tha dil mein duniya ka KHayal
khul gain aanhken to dekha hum ne sab afsana hai

sher ustadana o 'hatim' hai be-bakana-waza
taba aazadana o auqat darweshana hai