Gham mujhe hasrat mujhe wahshat mujhe sauda mujhe

gham mujhe hasrat mujhe wahshat mujhe sauda mujhe
ek dil de kar KHuda ne de diya kya kya mujhe

hai husul-e-arzu ka raaz tark-e-arzu
main ne duniya chhoD di to mil gai duniya mujhe

ye namaz-e-ishq hai kaisa adab kis ka adab
apne pa-e-naz par karne bhi de sajda mujhe

kah ke soya hun ye apne iztirab-e-shauq se
jab wo aaen qabr par fauran jaga dena mujhe

subh tak kya kya teri ummid ne tane diye
aa gaya tha sham-e-gham ek nind ka jhoka mujhe

dekhte hi dekhte duniya se main uTh jaunga
dekhti ki dekhti rah jaegi duniya mujhe

jalwa-gar hai is mein ai 'simab' ek duniya-e-husn
jam-e-jam se hai ziyaada dil ka aaina mujhe