Gham ki barish ne bhi tere naqsh ko dhoya nahin

gham ki barish ne bhi tere naqsh ko dhoya nahin
tu ne mujh ko kho diya main ne tujhe khoya nahin

nind ka halka gulabi sa KHumar aankhon mein tha
yun laga jaise wo shab ko der tak soya nahin

har taraf diwar-o-dar aur un mein aankhon ke hujum
kah sake jo dil ki haalat wo lab-e-goya nahin

jurm aadam ne kiya aur nasl-e-adam ko saza
kaTta hun zindagi bhar main ne jo boya nahin

jaanta hun ek aise shaKHs ko main bhi 'munir'
gham se patthar ho gaya lekin kabhi roya nahin