ghaflaton ka samar uThata hun
rose taza KHabar uThata hun
baat baDhti hai tul dene se
so ise muKHtasar uThata hun
ho ke bashinda ek sitare ka
ungliyan chand par uThata hun
chumte hain jise uTha kar log
main use chum kar uThata hun
ab kahan aasman chhune ko
zahmat-e-baal-o-par uThata hun
su-e-manzil mein har qadam apna
ek falak chhoD kar uThata hun
war karti hai jab palaT kar mauj
ehtiyatan bhanwar uThata hun
apni maftuha sar-zaminon par
panw rakhta hun sar uThata hun
Ghazal
Ghaflaton ka samar uThata hun
Sarfraz Zahid