gate hue peDon ki KHunuk chhanw se aage nikal aae
hum dhup mein jalne ko tere ganw se aage nikal aae
aisa bhi to mumkin hai mile be-talab ek muzhda-e-manzil
hum apni duaon se tamannaon se aage nikal aae
thoDa sa bhi jin logon ko irfan-e-mazahib tha wo bach kar
kabon se shiwalon se kalisaon se aage nikal aae
the hum bhi gunahgar har ek zahid-e-makkar ki zid mein
bazar mein bikti hui salmaon se aage nikal aae
shahron ke makinon se mili jab hamein wahshat ki zamanat
hum si ke garebanon ko sahraon se aage nikal aae
banti rahi ek duniya 'qatil' apni KHaridar magar hum
yusuf na bane aur zuleKHaon se aage nikal aae
Ghazal
Gate hue peDon ki KHunuk chhanw se aage nikal aae
Qateel Shifai