naqsh aankhon mein utara jaega
phir safar mein din guzara jaega
pahle daKHil hoga shab ke shahr mein
phir sawere ko pukara jaega
jab umiden KHatm sab ho jaengi
waqt phir kaise guzara jaega
haar kirnon ka bana kar jhil ke
aaine mein din sanwara jaega
dekh le gar ek nazar suraj ise
kohra ye be-maut mara jaega
tham kar rakh tinka warna ek din
hath se ye bhi sahaara jaega
jab bhaTak jaega sahra mein bahut
tab samundar ko pukara jaega
bebasi mein Dubi nazron se falak
ab qafas se bas nihaara jaega
Ghazal
Naqsh aankhon mein utara jaega
Seema Sharma Meeruthi