fasil-e-shab pe taron ne likha kya
main mahw-e-KHwab tha tum ne paDha kya
faza mein ghul gae hain rang kitne
zara si dhup se baadal khula kya
hawaon ko ulajhne se hai matlab
meri zanjir kya teri rida kya
charagh ek dusre se puchhte hain
sabhi ho jaenge rizq-e-hawa kya
badan mein qaid ho kar rah gai hai
hamari ruh ka tha muddaa kya
jise bhi dekhiye wo nind mein hai
hamare shahr ko aaKHir hua kya
Ghazal
Fasil-e-shab pe taron ne likha kya
Vikas Sharma Raaz