fasad-e-qalb-o-nazar hasil-e-tamasha dekh
sawar-e-markab-e-duniya ghubar-e-duniya dekh
tamam kar-e-ajal hai numud-e-past-o-faraaz
nawishta-e-sar-e-kohsar-o-bagh-o-dariya dekh
har imtihan hai nae sanehe ka pas-manzar
dikhai kuchh nahin deta to rah-e-farda dekh
wo apni tegh se KHud hi lahuluhan hua
mere badan pe to har zaKHm hai usi ka dekh
ajab nahin ki ho diwar nuqta-e-mauhum
makan ho ki makin do dilon ka milna dekh
jo ho sake nigah-e-aib-ju utar ke phenk
kamal-e-hairat-o-fitrat jamal-e-zeba dekh
kabhi kabhi nigah-e-sard ho KHumar-alud
kabhi kabhi dil-e-be-mehr ko taDapta dekh
kabhi kabhi sahi uD jae hosh ka daman
kabhi kabhi to ye kaifiyyat-e-nazara dekh
KHayal dil se nazar hai KHayal se nazuk
zara sambhaal ke guldasta-e-tamanna dekh
ye waqia hai ki KHushbu-e-mushk aati hai
bala-e-jaan sar-e-bazar mujh ko ruswa dekh
Ghazal
Fasad-e-qalb-o-nazar hasil-e-tamasha dekh
Syed Amin Ashraf