اردو हिंदी
Farz-e-supurdagi mein taqaze nahin hue | Shaahi Shayari
farz-e-supurdagi mein taqaze nahin hue

Ghazal

Farz-e-supurdagi mein taqaze nahin hue

Vipul Kumar

;

farz-e-supurdagi mein taqaze nahin hue
tere kahan se hon ki hum apne nahin hue

kuchh qarz apni zat ke ho bhi gae wasul
jaise tere supurd the waise nahin hue

achchha hua ki hum ko maraz la-dawa mila
achchha nahin hua ki hum achchhe nahin hue

us ke badan ka moD baDa KHush-gawar hai
hum bhi safar mein umr se Thahre nahin hue

ek roz khel khel mein hum us ke ho gae
aur phir tamam umr kisi ke nahin hue

hum aa ke teri bazm mein be-shak hue zalil
jitne gunahgar the utne nahin hue

is bar jang us se raunat ki thi so hum
apni ana ke ho gae us ke nahin hue