Falak ko fikr koi mehr-o-mah tak pahonche

falak ko fikr koi mehr-o-mah tak pahonche
hamein ye zoam ki hum wah wah tak pahonche

unhen na rakh tu karam ki nigah se mahrum
jo luT-luTa ke teri bargah tak pahonche

hua na hum se mudawa-e-dard-e-nau-e-bashar
bahut chale to sawab-o-gunah tak pahonche

na jaane kab se hun sargarm-e-justuju ai dost
na jaane kab ruKH-e-manzil nigah tak pahonche

wufur-e-shauq mein ye ehtiyat ho na saki
ki aarzu na hamari nigah tak pahonche

hamari zist ki rudad-e-gul ye hai 'jawed'
ki mai-kade se chale KHanqah tak pahonche