Ek wo hi shaKHs mujhko ab gawara bhi nahin

ek wo hi shaKHs mujh ko ab gawara bhi nahin
jabr ye us ke siwa apna guzara bhi nahin

shakl-e-hijrat rang lain aaKHirash sab koshishen
hum agar lauTe nahin us ne pukara bhi nahin

jis pe tum KHamosh ho bas ek zara si baat thi
baat bhi aisi ki jis mein kuchh KHasara bhi nahin

hain ajab dariya mein hum jo darmiyan se KHushk hai
aur ajab to ye kinare par kinara bhi nahin

fazl ek bas be-hisi aur shaghl ek bas KHamushi
yani koi zindagi ka istiara bhi nahin

aa ke mere ghar ka 'atif' ye tamasha dekhiye
mere dar-diwar ko chhat ka sahaara bhi nahin

bas bhi kar 'atif' ke teri rahbari se baz aae
ghaar-e-shab mein subh ka koi sitara bhi nahin