Ek ek qatra us ka shoala-fishan sa hai

ek ek qatra us ka shoala-fishan sa hai
mauj-e-saba pe reg-e-rawan ka guman sa hai

shayad yahi hai hasil-e-umr-e-gurez-pa
phaila hua dimagh mein har-su dhuan sa hai

phanki hai jab se main ne tere rup ki dhanak
ehsas rang-o-nur ka sail-e-rawan sa hai

nanha sa tar ufuq pe jo ab tak hai zau-fishan
tariki-e-hayat pe bar-e-garan sa hai

shab-bhar jahan pighalti rahi chand si 'zamir'
us shaKH pe ba-shakl-e-dil ab tak nishan sa hai