Ek aaseb ka saya tha jo sar se utra

ek aaseb ka saya tha jo sar se utra
jaise ek tair-e-manhus shajar se utra

yun laga jaise giran-bari-e-shab KHatm hui
ghaza-e-kizb-o-riya ru-e-sahar se utra

apna ghar bhi mujhe zindan ki tarah lagta tha
zang-alud sa tala mere dar se utra

shayad ab talKH haqaeq se shanasai ho
kor-chashmi ka ye parda sa nazar se utra

gham ka izhaar nahin ashk-e-nadamat jaano
qatra-e-ab agar dida-e-tar se utra

rahraw-e-dasht-e-bala ranj-e-safar bhulega
taKHt-e-bilqis agar gard-e-safar se utra

ab shafaq-rang ujalon ka saman dekhenge
halqa-e-abr-e-siyah shams-o-qamar se utra