ehsas-e-KHushi miT jata hai afsurda tabiat hoti hai
dil par wo ghaDi bhi aati hai jab gham ki zarurat hoti hai
do harf bhi mere sun na sake tum itne kyun bezar hue
main ne tumhein apna samjha tha apnon se shikayat hoti hai
ye sud-o-ziyan ke paimane ye jhuTe sachche afsane
in ahl-e-hawas ki baaton se badnam mohabbat hoti hai
ek dusri botal aane tak ye durd-e-tah-e-saghar hi sahi
o tishna-e-mai betab na ho saqi ko nadamat hoti hai
'mahir' ki sada baaton se allah bachata hi rakkhe
KHud to ye baDe hi hazrat hain auron ko nasihat hoti hai
Ghazal
Ehsas-e-KHushi miT jata hai afsurda tabiat hoti hai
Mahirul Qadri