Duniya-e-mohabbat mein humse har apna paraya chhuT gaya

duniya-e-mohabbat mein hum se har apna paraya chhuT gaya
ab kya hai jis par naz karen ek dil tha wo bhi TuT gaya

saqi ke hath se masti mein jab koi saghar chhuT gaya
mai-KHane mein ye mahsus hua har mai-kash ka dil TuT gaya

jab dil ko sukun hi ras na ho phir kis se gila nakaami ka
har bar kisi ka hathon mein aaya hua daman chhuT gaya

socha tha harim-e-jaanan mein naghma koi hum bhi chheD saken
ummid ne saz-e-dil ka magar jo tar bhi chheDa TuT gaya

kya shai thi kisi ki pahli nazar kuchh is ke alawa yaad nahin
ek tir sa dil mein jaise laga paiwast hua aur TuT gaya

is naghma-taraaz-e-gulshan ne toDa hai kuchh aisa saz-e-dil
ek tar kahin se TuT gaya ek tar kahin se TuT gaya