Duniya apni maut jald-az-jald mar jaane ko hai

duniya apni maut jald-az-jald mar jaane ko hai
ab ye Dhancha aisa lagta hai bikhar jaane ko hai

ain us dam neshtar le aati hain yaaden teri
zaKHm tanhai ka lagta hai ki bhar jaane ko hai

jaane wale aur kuchh din sog karna hai tera
zehn-o-dil se phir ye nashsha bhi utar jaane ko hai

waqt-e-ruKHsat bad-gumani teri aisa ghaw thi
rafta rafta ab jo apna kaam kar jaane ko hai

hum haqiqat-ashna logon se kam milte hain log
un ko samjhao ye shiraaza bikhar jaane ko hai

rut hua badlegi sab gul shaKH par mar jaenge
ab ye mausam KHushbuon ka par katar jaane ko hai