Dua se kuchh na hua iltija se kuchh na hua

dua se kuchh na hua iltija se kuchh na hua
buton ke ishq mein yaad-e-KHuda se kuchh na hawa

main ek kya hun sabhi ba-wafa hain shaki-e-jaur
tum ek kya ho kisi bewafa se kuchh na hua

bhari to thi magar apne asar ko la na saki
gai to thi magar aah-e-rasa se kuchh na hua

wo aarzu hun ki jis aarzu ki kuchh na chali
wo muddaa hun ki jis muddaa se kuchh na hua

yahi sahi ki KHushi se mile mile to sahi
yahi sahi ki hamari dua se kuchh na hua

wo ek hum ki jo chaha kiya visal ki raat
wo ek tum ki tumhaari haya se kuchh na hua

unhen bula ke tasawwur mein hum mile 'muztar'
hawas to ho gai puri bala se kuchh na hua