dosti apni jagah aur dushmani apni jagah
farz ke anjam dene ki KHushi apni jagah
hum to sargarm-e-safar hain aur rahenge umr bhar
manzilen apni jagah aawargi apni jagah
pattharon ke des mein shishe ka hai apna waqar
dewta apni jagah aur aadmi apni jagah
gyan mana hai baDa bhakti bhi lekin kam nahin
aagahi apni jagah diwangi apni jagah
subh hain sajde mein hum to sham saqi ke huzur
bandagi apni jagah aur mai-kashi apni jagah
sara aalam hai tarannum-KHez ai shair-nawaz
sher ki apni jagah aur tarz ki apni jagah
Ghazal
Dosti apni jagah aur dushmani apni jagah
Ganesh Bihari Tarz