din kaT rahe hain kashmakash-e-rozgar mein
dam ghuT raha hai saya-e-abr-e-bahaar mein
aati hai apne jism ke jalne ki bu mujhe
luTte hain nikhaton ke subu jab bahaar mein
guzra udhar se jab koi jhonka to chaunk kar
dil ne kaha ye aa gae hum kis dayar mein
main ek pal ke ranj-e-farawan mein kho gaya
murjha gae zamane mere intizar mein
hai kunj-e-afiyat tujhe pa kar pata chala
kya hamhame the gard-e-sar-e-rah-guzar mein
Ghazal
Din kaT rahe hain kashmakash-e-rozgar mein
Majeed Amjad