din hai be-kaif be-gunahon sa
na-kushada sharab-gahon sa
kuchh faqirana be-niyazi bhi
kuchh mizaj apna baadshahon sa
dil dar-e-mai-kada sa wa sab par
ghar bhi rakhte hain KHanqahon sa
sab pe khulte nahin magar mere sher
haal hai kuchh teri nigahon sa
aa gaya hai bayan mein kyunkar
pech-o-KHam sara teri rahon sa
kuchh nafas mein sharab ki si mahak
kuchh hawa mein nasha gunahon sa
ujli ujli pahaDiyon par 'zeb'
rang utra hai jalwa-gahon sa
Ghazal
Din hai be-kaif be-gunahon sa
Zeb Ghauri