dil se agar kabhi tera arman jaega
ghar ko laga ke aag ye mehman jaega
sab honge us se apne taaruf ki fikr mein
mujh ko mere sukut se pahchan jaega
is kufr-e-ishq se mujhe kyun rokte ho tum
iman walo mera hi iman jaega
aaj us se main ne shikwa kiya tha shararatan
kis ko KHabar thi itna bura man jaega
ab is maqam par hain meri be-qarariyan
samjhane wala ho ke pasheman jaega
duniya pe aisa waqt paDega ki ek din
insan ki talash mein insan jaega
Ghazal
Dil se agar kabhi tera arman jaega
Fana Nizami Kanpuri