dil par kisi patthar ka nishan yun hi rahega
ta-umr ye shishe ka makan yun hi rahega
hum Thahre rahenge kisi tabir ko thame
aankhon mein koi KHwab rawan yun hi rahega
hai dhund mein Duba hua is shahr ka manzar
kya jaaniye kab tak ye saman yun hi rahega
kuchh der rahegi abhi bazar ki raunaq
kuchh der ye hone ka guman yun hi rahega
bujh jaega ek roz teri yaad ka shola
lekin mere sine mein dhuan yun hi rahega
lau de to raha hai mere KHwabon ke ufuq par
lekin ye sitara bhi kahan yun hi rahega
Ghazal
Dil par kisi patthar ka nishan yun hi rahega
Inam Nadeem