dil muzmahil hai teri nawazish ke bawajud
ye sarzamin udas hai barish ke bawajud
KHira na kar sake nigah-e-imtiyaz ko
jhuTe nagin numud-o-numaish ke bawajud
ek phul bhi chaman mein na dil khol kar hansa
shabnam ke aansuon ki guzarish ke bawajud
kya qahr hai ki jhuT mein milti hai aafiyat
sach bolna muhaal hai KHwahish ke bawajud
mera waqar zist na majruh kar sake
dushman hazar hila-o-sazish ke bawajud
apni ghalat rawish ko na tabdil kar sake
kuchh dost bar bar guzarish ke bawajud
barKHud ghalat kabhi na hue zindagi mein 'lais'
duniya-e-fan mein dad-o-sataish ke bawajud
Ghazal
Dil muzmahil hai teri nawazish ke bawajud
Lais Quraishi