dil ko hua hai ishq mohabbat ke dagh se
parwana lau lagae hue hain charagh se
didar-e-ruKH nasib hua dil ke dagh se
suraj ko main ne DhunDh liya is charagh se
ek dagh-e-dil ne mujh ko diye be-shumar dagh
paida hue hazar charagh is charagh se
afsurda yun hua dil-e-sozan ko uf na ki
aisa bujha dhuan bhi na nikla charagh se
'natiq' dilon mein nur hai is sham-e-husn ka
raushan hai sab ke ghar ka charagh is charagh se
Ghazal
Dil ko hua hai ishq mohabbat ke dagh se
Natiq Lakhnavi