dil ki KHwahish baDhte baDhte tufan hoti jati hai
zar ki chahat ab logon ka iman hoti jati hai
pyar mohabbat hamdardi ke rishte the insanon mein
dil walon ko ab ye duniya zindan hoti jati hai
marghaT ka sa sannaTa hai ghar kuche bazaron mein
dil ki basti rafta rafta viran hoti jati hai
insanon ke KHun ke pyase aur nahin KHud insan hain
aql bichaari dekh ke duniya hairan hoti jati hai
jhuTe wade sunte sunte sapne chakna-chur hue
mayusi be-zari dil mein mehman hoti jati hai
Ghazal
Dil ki KHwahish baDhte baDhte tufan hoti jati hai
Ahmad Shahid Khan