Dil ka har zaKHm jawan ho to ghazal hoti hai

dil ka har zaKHm jawan ho to ghazal hoti hai
dard nas nas mein rawan ho to ghazal hoti hai

dil mein ho shauq-e-mulaqat ka tufan bapa
aur raste mein chunan ho to ghazal hoti hai

shauq hasrat ke shararon se jila pata hai
jaan-e-jaan dushman-e-jaan ho to ghazal hoti hai

kuchh bhi hasil nahin yak-tarfa mohabbat ka janab
un ki jaanib se bhi han ho to ghazal hoti hai

shaukat-e-fan ki qasam husn-e-taKHyyul ki qasam
dil ke kabe mein azan ho to ghazal hoti hai

main agar un ke KHad-o-KHal mein kho jaun kabhi
wo kahen naz kahan ho to ghazal hoti hai