dil-e-ashufta pe ilzam kai yaad aae
jab tera zikr chhiDa nam kai yaad aae
tujh se chhuT kar bhi guzarni thi so guzri lekin
lamha lamha sahar o sham kai yaad aae
hae nau-umr adibon ka ye andaz-e-bayan
apne maktub tere nam kai yaad aae
aaj tak mil na saka apni tabahi ka suragh
yun tere nama o paigham kai yaad aae
kuchh na tha yaad ba-juz-kar-e-mohabbat ek umr
wo jo bigDa hai to ab kaam kai yaad aae
KHud jo lab-tishna the jab tak to koi yaad na tha
pyas bujhte hi tahi-jam kai yaad aae
Ghazal
Dil-e-ashufta pe ilzam kai yaad aae
Jameeluddin Aali