diwar par likha na paDho aur KHush raho
kahta hai jo gajar na suno aur KHush raho
apnaiyat ka KHwab to dekho tamam umr
beganagi ka zahr piyo aur KHush raho
kanTe jo doston ne bikhere hain rah mein
palkon se apni aap chuno aur KHush raho
baaten tamam un ki suno gosh-e-hosh se
apni taraf se kuchh na kaho aur KHush raho
wo kaj-ada hain gar to na shikwa karo kabhi
behtar hai zahr-e-ishq piyo aur KHush raho
shikwa kiya zamane ka to us ne ye kaha
jis haal mein ho zinda raho aur KHush raho
'anwar-sadid' haal agar mehrban nahin
mazi ko apne yaad karo aur KHush raho
Ghazal
Diwar par likha na paDho aur KHush raho
Anwar Sadeed