Didani hai bahaar ka manzar

didani hai bahaar ka manzar
zahr chhiDka gaya daraKHton par

bun rahe hain urus-e-gul ka kafan
magas-e-barg o ankabut-e-shajar

chil kawwon ko takte rahiye
chand taron se thak gai hai nazar

jo mera takiya-e-jawani tha
usi bargad ki jhuk gai hai kamar

hath phaila ke chiKHte hain daraKHt
sarsar-e-hadisa ka ruKH hai kidhar

surKH phulon ke lal angare
chashm-e-zard-e-uqab ke aKHgar

wo jabin-e-shafaq pe KHatt-e-shua
KHun se kis ke surKH hai KHanjar

ab ke barsat kuchh to ras aai
ghas ugne lagi munDeron par

dhup is sahn mein na dar aae
band kar do tamam rauzan-e-dar

raqs karte hue bagulon mein
dew o jinnat o ruh ke lashkar

dekhta hun ki kya dikhate hain
apne sae pe jam gai hai nazar

aalam-e-be-KHudi mein gahra sans
sina-e-kaenat mein hai safar

aap apne se kyun gurezan hun
kisi aaseb ka hai mujh pe asar

kaun mere liye hai shab-bedar
kyun baraste hain raat bhar patthar

main hi main hun KHala-e-tira mein
na atarid na mushtari na qamar

tah-ba-tah zulmaten hain jumbish mein
rengte hain siyah-posh azhdar

jabalushshams ki bulandi se
dekhta hun zamin ko jhuk jhuk kar

ek pur-nur nilgun nuqta
kanpta hai KHala mein rah rah kar

kahkashan se shumal ki jaanib
waqt ke be-nishan mehwar par

nur ke daere hain gardish mein
aaKHir in qafilon ka ruKH hai kidhar

kaun aaKHir jhinjhoDta hai mujhe
aalam-e-KHwab mein sar-e-bistar

kaun aaKHir mujhe jagata hai
aaKHir shab mein rose aa aa kar

na shahaba na koi tayyara
kaun uD kar gaya idhar se udhar