اردو हिंदी
Dida-o-danista dhoka kha gae | Shaahi Shayari
dida-o-danista dhoka kha gae

Ghazal

Dida-o-danista dhoka kha gae

Manzoor Husain shor

;

dida-o-danista dhoka kha gae
hum fareb-e-zindagi mein aa gae

jab hujum-e-shauq se ghabra gae
kho gae KHud aur tum ko pa gae

chain bhi lene nahin dete mujhe
main abhi bhula tha phir yaad aa gae

main kahan jaun nazar ko kya karun
aap to sari faza par chha gae

dil hi dil mein uff wo dard-e-na-gahan
aankhon hi aankhon mein kuchh samjha gae

ruKH se aanchal bhi na sarka tha abhi
nichi nazren ho gain sharma gae

uff ye ghunchon ka tabassum ye bahaar
haif agar ye ghunche kal murjha gae

jis qadar ghunche khile the nau-ba-nau
meri aankhon se lahu barsa gae

puchhte kya ho in ashkon ka sabab
waqiat-e-rafta phir yaad aa gae

ab to 'shor' apna fasana KHatm kar
un ki aankhon mein bhi aansu aa gae