Dekhne mein ye kanch ka ghar hai

dekhne mein ye kanch ka ghar hai
raushni aadmi ke andar hai

kaisa ujDa hua ye manzar hai
ghar ke hote bhi koi be-ghar hai

misl-e-yunus hun batn-e-mahi mein
mere chaaron taraf samundar hai

us ke kya kya suluk dekhe hain
waqt hi baKHt ka sikandar hai

dekhne mein hai wo waraq sada
paDhne baiThun to ek daftar hai

raushni ho to koi pahchane
kaun rahzan hai kaun rahbar hai

sans lena bhi moajiza hai yahan
zindagi aag ka samundar hai

rose paDhta hun bhiD ke chehre
sab ke chehre pe ek manzar hai

us ki taswir kis tarah khinchun
mera mahbub mere andar hai

apni rudad mujh ko yaad nahin
dil ko lekin tamam azbar hai