darpai-e-umr-e-rafta hun yarab
har-dam az-KHud guzishta hun yarab
kya hun maqbul-e-tab-e-ahl-e-suKHan
ek mazmun-e-basta hun yarab
kya dikhaun main apne jauhar aah
shakl-e-tegh-e-shikasta hun yarab
apni kam-fursati kahun kya aah!
aah az-sina jasta hun yarab
pani pani hun jis ko dekh jahim
soz-e-gham se wo tafta hun yarab
dekho kya ho ki wan hai naz-e-ghurur
main ye ahwal-e-KHasta hun yarab
Ghazal
Darpai-e-umr-e-rafta hun yarab
Jurat Qalandar Bakhsh