Dariya-e-mohabbat mein maujen hain na dhaara hai

dariya-e-mohabbat mein maujen hain na dhaara hai
yun shauq-e-maraatib ne pasti mein utara hai

is shahar-e-taghaful mein hum kis ko kahen apna
wo shahr jo duniya mein kahne ko hamara hai

aaankhon mein kabhi the ab, hathon mein hain bachchon ke
suraj hai ki chanda hai, jugnu hai ki tara hai

wo husn-e-mujassam jab guzra hai chaman se tab
KHud apna sarapa bhi phulon ne sanwara hai

aa jate ho kyun aaKHir yun KHwab nae le kar
is shahr-e-tazabzub mein kya hai jo tumhaara hai

marub huin qadren jab apni yahan, hum ne
maghrib ke darichon se mashriq ko ubhaara hai

ab jaen to pahchane shayad hi wahan koi
wo des jahan hum ne ek arsa guzara hai

nale to kahin aahen, ek hashr sa hai har su
hai kaun jo duniya se is tarah sidhaara hai

hum rahne lage 'KHalid' KHwabon ke jaziron mein
puchha tha kabhi us ne kya nam tumhaara hai