dariya dur nahin aur pyasa rah sakta hun
us se mile baghair bhi zinda rah sakta hun
us ki be-taufiq mohabbat ke jangal mein
aadha gum ho kar bhi aadha rah sakta hun
kaisa rahta hun mat puchho shahr mein us ke
waisa hi rahta hun jaisa rah sakta hun
tanha rahne mein bhi koi uzr nahin hai
lekin us ke sath hi tanha rah sakta hun
wo bhi daman chhoDne ko tayyar nahin hai
main bhi abhi is shaKH se uljha rah sakta hun
kuchh mujh ko KHud bhi andaza hona chahiye
kitna zae ho kar kitna rah sakta hun
jis haalat se nikal aaya hun koshish karke
is mein wo chahe to dobara rah sakta hun
ek anokhe KHwab ke andar sote jagte
rahta hun main aur hamesha rah sakta hun
jitne fasle par rakhta hai 'zafar' wo mujh ko
rah bhi sakta hun lekin kya rah sakta hun
Ghazal
Dariya dur nahin aur pyasa rah sakta hun
Zafar Iqbal