Dard-shanas dil nahin jalwa-talab nazar nahin

dard-shanas dil nahin jalwa-talab nazar nahin
hadsa kitna saKHt hai un ko abhi KHabar nahin

aur baDhega dard-e-dil raat jo bhig jaegi
dekh na waqt ki taraf waqt bhi chaaragar nahin

kis ko KHabar ki hum se kab aap nigah pher len
nashsha to dhup chhanw hai baada bhi mo'tabar nahin

hum to KHizan ki dhup mein KHun-e-jigar chhiDak chale
mausam-e-gul ki chandni kis ko mile KHabar nahin

dil ke talluqat se kaun sa dil ko chain hai
aao kisi se toD len rishta-e-dil magar nahin

ishq pe kaisa dukh paDa husn pe kya guzar gai
aaj gali udas hai aaj wo baam par nahin

dil se 'shamim' guftugu dekhiye kab talak chale
raat bhi muKHtasar nahin baat bhi muKHtasar nahin